MPSC PSI Success Story : वसमत तालुक्यातील धामणगाव येथील गजानन चंपतराव हरबळे यांनी गावाचे नाव रोषण केले आहे. गजाननची परिस्थिती बेताची होती. घरचे संपूर्ण कुटुंब हे शेतीवर अवलंबून असल्याने शेतीवर उदरनिर्वाह चालतो.
गजानन यांचे प्राथमिक शिक्षण गावातील जिल्हा परिषद शाळेमध्ये झाले. आपले महाविद्यालयीन शिक्षण पूर्ण करून त्यांनी पुणे येथे आपली तयारी सुरु ठेवली. याच मेहनतीच्या जोरावर त्याची मंत्रालयात लिपिक म्हणून निवड झाली होती. अजून चांगली पोस्ट मिळावी यासाठी त्याने अभ्यासाला सुरुवात केली.
राज्यातील पोलीस उपनिरीक्षक भरतीची जाहिरात २०२० मध्ये जाहीर झाली होती. त्याची पूर्व परीक्षा २०२१ ला, मुख्य परीक्षा २०२२ ला झाली. शारीरिक परीक्षा फेब्रुवारीत तर मुलाखत मार्च मध्ये होऊन त्याचा निकाल जुलै २०२३ मध्ये जाहीर झाला. यात त्याची पीएसआय पदी निवड झाली. पोलीस उपनिरीक्षक पदाला गवसणी घालून धामणगाव आणि पंचक्रोशीतील पहिला पीएसआय होण्याचा बहुमान मिळवला आहे. ही गावासाठी अभिमानाची बाब आहे.तसेच गावातील स्पर्धा परीक्षेची तयारी करणाऱ्या इतर होतकरू मुलांना नक्कीच त्यांच्यापासून प्रेरणा मिळेल. त्याने जिद्द, चिकाटी, अनुभव आणि स्वयंअध्ययनाच्या जोरावर त्यांनी उराशी बाळगलेले स्वप्न पूर्ण करून दाखवले.
