चहाच्या हॉटेलसह बांधकाम ठेकेदाराकडे केलं काम ; आता जिद्दीच्या जोरावर MPSC मारली बाजी
MPSC कडून दरवर्षी विविध पदांवर भरती घेली जाते. यात विद्यार्थी रात्रंदिवस मेहनत घेत असतात. यात काहींना यश मिळते तर काहींच्या पदरी निराशा. दरम्यान, कौटुंबिक कलह आणि आर्थिक परिस्थिती बेताची असूनही चहाच्या हॉटेलवर आणि बांधकाम ठेकेदाराकडे काम करून शिक्षण पूर्ण करीत बांधकाम विभागात वर्ग दोनची नोकरी मिळवली. त्यानंतर आता एमपीएससीतून वर्ग १ च्या अधिकारीपदी निवड झाली. अंगावर शहारे आणणारी ही जिद्दीची कथा आहे, कापडणे येथील तरुण गणेश माळी यांची… MPSC Success Story
गणेश माळी यांची घरात गरिबीची परिस्थिती असल्याने इयत्ता चौथीमध्ये शिकत असताना चहाच्या हॉटेलवर तीस रुपये रोजाने काम केले.यात घरात आई व वडिलांचा कौटुंबिक वाद अस्वस्थ करत होता. अशा परिस्थितीत मधील काळात शिक्षण सुटले, मात्र चहा हॉटेलवर काम करीत असताना गावातील माध्यमिक शाळेत गणेश माळी हे गेले असता उदय पाटील, सतीश पाटील या शिक्षकांनी त्यांच्या अडचणी जाणून घेतल्या. त्यांनी त्यांच्या वडिलांची भेट घेऊन गणेशचे शिक्षण पुन्हा सुरू केले. शिक्षण सुरू झाले पण कालांतराने कौटुंबिक कलाहने आई कुटुंब सोडून निघून गेली.
यामुळे त्यांच्यासह व लहान बहीण संगीता मनाने खचली. वडील काशिनाथ माळी यांनी दोन्ही लेकरांना कवेत घेत रात्रंदिवस काम करून गणेशच्या शिक्षणाला प्रोत्साहन दिले. लहान बहिणीने शिक्षणासह घरकाम सांभाळले. कापडणे येथे गणेश व वडील काशिनाथ माळी हे मिळेल ते काम करू लागले. यात बांधकामासह प्रत्येक काम ते करू लागले.
मात्र जास्ती काम करूनही पुरेशे पैसे मिळत नसल्याने त्यांनी नाशिक गाठले. याठिकाणी एका बांधकाम व्यावसायिकाकडे वॉचमनचे काम करीत त्याच ठिकाणी पत्र्याच्या दहा बाय दहाच्या खोलीत जीवनप्रवास सुरू होता. या काळात गणेशने आपले माध्यमिक शिक्षण नाशिक शहरातच पूर्ण केले. २०१९ साली जलसंपदा विभागात क्लास २ ची जागा मिळवली. पुढे पुन्हा अभ्यासक्रम अविरत ठेवल्यामुळे गणेश माळी यांनी अखेर सार्वजनिक बांधकाम विभागात क्लास १ ची जागा मिळवत यश प्राप्त केले. लवकरच ते नवीन पदावर रुजू होणार आहेत.
