चालू घडामोडी : ०६ जून २०२०

Current Affairs 06 June 2020

देशात पाच वर्षांत २०० नगर वने

• ग्रामीण भागात वने असली तरी शहरी भागांमध्ये ती विकसित करण्याची गरज आहे. म्हणूनच केंद्राने ‘नगर वने’ ही योजना सुरू केली असून पुढील पाच वर्षांत २०० नगर वने विकसित केली जातील, अशी माहिती केंद्रीय पर्यावरणमंत्री प्रकाश जावडेकर यांनी जागतिक पर्यावरण दिनानिमित्त झालेल्या कार्यक्रमात दिली.
• या वर्षी जागतिक पर्यावरण दिनाचा मुख्य विषय ‘जैवविविधता’ हा असून त्याचा उल्लेख पंतप्रधान नरेंद्र मोदी यांनी मन की बात कार्यक्रमात केला होता. झाडे लावण्याची व जगवण्याची गरज आहे. आज पर्यावरण दिनानिमित्त हाच आपला संदेश आहे, असे जावडेकर म्हणाले.
• शहरांतील वनजमीन व ओसाड जमीन यांचे आरेखन करून नगर वने निर्माण करण्यासाठी हे भाग राखीव ठेवावेत, अशी सूचना जावडेकर यांनी नगरपालिकांना केली.
• जगातील १६ टक्के लोकसंख्या व पशुसंख्या भारतात आहे. मात्र, जगाच्या तुलनेत फक्त २.५ टक्के भूमी व ४ टक्के नैसर्गिक जलस्रोत उपलब्ध आहेत. तरीही आपण जागतिक जैवविविधतेपैकी ८ टक्के जैवविविधतेचे संरक्षण केले आहे. नगर वनांचा वा शहरी वनक्षेत्रांचा विकास केल्यास वातावरणातून २.५ ते ३ अब्ज टन कार्बन डायऑक्साइड काढून घेण्याचा भारताचा निर्णय प्रत्यक्षात येऊ शकेल, असे त्यांनी सांगितले.
• पुण्यात सुमारे ९ हजार एकर वनजमीन असून वारजे शहरी वनक्षेत्र अतिक्रमणाच्या सावटाखाली होते. २०१५ मध्ये हा परिसर हरितस्थळ म्हणून विकसित केला गेला. सरकारी व खासगी क्षेत्राच्या सहभागाने नगर वन विकसित करण्यात आले. वारजे वनक्षेत्रात आता वनस्पतींच्या २३, पक्ष्यांच्या २९, फुलपाखरांच्या १५, सरपटणाऱ्या प्राण्यांच्या १० आणि सस्तन प्राण्यांच्या ३ प्रजाती आहेत. २०१५ ते २०१७ या दोन वर्षांमध्ये साडेसहा हजार झाडे लावली गेली. वारजे वनक्षेत्र दरवर्षी १.२९ लाख किलो कार्बन डायऑक्साइड शोषून घेते. ५.६२ लाख किलो ऑक्सिजनची निर्मिती करते. अशा रीतीने देशभर शहरी भागांमध्ये नगर वने विकसित करता येऊ शकतात. वारजे वनक्षेत्र हे देशासाठी प्रारूप आहे, असे जावडेकर म्हणाले.

फुटबॉल : भारताला मिळाले २०२२ महिला आशिया कपचे यजमानपद

• एशियन फुटबॉल फेडरेशनने (एएफसी) २०२२ महिला आशिया कपचे यजमानपद भारताला दिले. १९७९ पासून सुरू असलेल्या स्पर्धेचे आयोजन पहिल्यांदा देशात होईल. फेब्रुवारीमध्ये एएफसी महिला फुटबॉल समितीने भारताला यजमानपद स्वीकारण्याची विनंती केली होती. ऑल इंडिया फुटबॉल फेडरेशनला लिहिलेल्या पत्रात एएफसीचे महासचिव दाटो विंडसर जॉन यांनी म्हटले की, ‘समितीने महिला आशिया कप २०२२ फायनल्सच्या आयोजनाची जबाबदारी ऑल इंडिया फुटबॉल फेडरेशनवर सोपवली आहे.’ एआयएफएफचे अध्यक्ष प्रफुल्ल पटेलने म्हटले की, या स्पर्धेमुळे महिला खेळाडूंना प्रोत्साहन मिळेल. स्पर्धेत १२ संघ सहभागी होतील.

सलूनचालकाची कन्या नेत्रा गुडविल अॅम्बेसेडार

• सलूनचालक मोहनदास यांची कन्या नेत्रा यूएनएडीएपी गुडविल अॅम्बेसेडार टू द पुअर बनली आहे. यूएन व्यासपीठावर तिला बोलण्याची संधी मिळेल. नेत्राने बचतीचे ८.५ लाख रुपये लाॅकडाऊन काळात गरीबांच्या जेवणावर खर्चले. मोदींनी ‘मन की बात’मध्ये हा उल्लेख केला.

किरण मजूमदारांना आंत्रप्रेन्योर ऑफ द इयर २०२० पुरस्कार

• बायोकॉन लिमिटेडच्या कार्यकारी अध्यक्ष किरण मजूमदार यांना ईवाय वर्ल्ड आंत्रप्रेन्योर ऑफ द इयर २०२० ने सन्मानित केले आहे.
• आभासी समारंभात त्यांना हा किताब दिला. किरण यांची ४१ देशांच्या ४६ पुरस्कार विजेत्यांतून निवड केली आहे. त्या भारताच्या तिसऱ्या ईवाय वर्ल्ड आंत्रप्रेन्योर झाल्या.
• त्यांच्याआधी कोटक महिंद्रा बँके(२०१४)चे उदय कोटक व इन्फोसिस टेक्नॉलॉजी लिमिटेड(२००५)चे नारायण मूर्ती यांना हा पुरस्कार मिळाला आहे.